Outros lugares de interese natural na Pontenova.

A Fraga de Reigadas.

A Fraga de Reigadas é un bosque de difícil orografía e que debido ao seu relativo illamento se conserva coma se o tempo non pasase por el. Este bosque posúe unha flora e unha fauna moi variada e ata existen referencias da presenza esporádica do oso pardo.

No interior deste enclave atópase a ferrería de Bogo, un conxunto etnográfico completamente restaurado hai uns anos e que mostra como funcionaba unha ferrería noutrora. Ademais neste sitio existe un aloxamento de turismo rural e pola zona pódense realizar múltiples rutas de sendeirismo e gozar da paisaxe e das numerosas fervenzas, formadas polo Río Reigadas, que existen na zona.

A Fraga de Carballido.

Este bosque cobre pequenos afluentes do Río Eo pola súa marxe dereita. Está situado no límite co Principado de Asturias dos Concellos da Fonsagrada, A Pontenova e Ribeira de Piquín e ocupa unha extensión de 4634 ha.

Trátase dunha zona de acceso complicado, debido á súa orografía extrema; pero que, gracias a isto, tamén ofrece unhas paisaxes espectaculares. As especies arbóreas máis importantes son o carballo (Querqus robur), o castiñeiro (Castanea sativa), o bidueiro (Betula alba) e o rebolo (Quercus pyrenaica). No relativo á fauna podemos destacar a presenza do falcón pequeno (Falco subbuteo), do tordo arrubiado (Turdus iliacus) e da marta (Martes martes).